Ажәабжьқәа

АПРОЕКТ «АҦСУА – УҦСАДГЬЫЛ УАҬАА!» АҲӘААҚӘА ИРҬАГӠАНЫ АҦСНЫҞА ИААИТ ИОРДАНИАНТӘ ҲЏЬЫНЏЬУАА АҦСШЬАҨЦӘА РАҲАСАБАЛА

24.08.2018

Апроект «Аҧсуа – уҧсадгьыл уаҭаа!» аҳәаақәа ирҭагӡаны Аҧсныҟа иааит Иорданиантә ҳџьынџьуаа, аҧсшьаҩцәа раҳасабала. Уи агәыҧ иалоуп занааҭла еиуеиҧшым ауаа – абизнесменцәа, аҳақьымцәа, аруаа, иара убас ахәыҷқәа.

Аҧсшьаҩцәа ргәыҧ дахагылоуп Иорданиа иҟоу Аҧсны Ахәаахәҭра-ааглыхратә палата ахаҭарнак Али Бакиџь.

Асасцәа рҧылараҿы Аҧсны ААП ахада Тамила Мерцхәлааҧҳа иазгәалҭеит, акыр шаҵанакуа ҳџьынџьуаа рыҧсадгьыл иахьаҭааз аҳәынҭқарратә ныҳәамшқәа разгәаҭара аламҭалазы: Аҧсны жәлар рџьынџьтәылатә еибашьра 1992-1993 шш. аҟны Аиааира 25-шықәса ахыҵреи, Урыстәыла Афедерациа Аҧсны ахьыҧшымра азхаҵара 10-шықәса ахыҵреи.

Лара убасгьы иазгәалҭеит, Урыстәыла иҟанаҵаз Аҧсны ахьаҧшымра азхаҵара иалҵшәаны, ҳҳәынҭқарра аекономика еиҳа аҿиара ишалагаз атәы, ҳәарада еиҳахеит аекспорти аимпорти рымҽхак.

Ҷыдала ААП ахада иазгәалҭеит ааигәа, Шьамтәылатәи Арабтә Республика иҟанаҵаз Аҧсны ахьаҧшымра азхаҵара, насгьы агәыӷра аалырҧшит иаарласны убри аҩыза ашьаҿа Иорданиагьы иҟанаҵап ҳәа.

Тамила Мерцхәлааҧҳа еизаз иргәалалыршәеит, апроект «Аҧсуа – уҧсадьгыл уаҭаа!» 2014 шықәсазы ишаҧшьигаз ААП аҧыхьатәи ахада Геннади Гагәылиа.

Апроект ахықәкы хадас иҟан – нҭыҵтәи адиаспора Аҧсныҟа рхьарҧшра, урҭ аҧсшьаҩцәа раҳасаб ала акәзаргьы рҭоурыхтә ҧсадьгыл раҭаара, ркультуреи рытрадициақәеи рнырразы.

Тамила Мерцхәлааҧҳа инаҵшьны иазгәалҭеит, Иорданиа ишықәынхо зхыҧхьаӡара рацәоу аҧсуа-дыга диаспора, урҭ рахь иаҵанакуеит хә-нызқьҩык аҧсуаа. Урҭ рыҟнытә маҷҩык роуп Аҧсны иаҭаахьа, убри азын, уажәазы имаҷҩымкәа ҳџьынџьуаа-аҧсшьаҩцәа ргәыҧ раара, ҳәарада, узыргәырӷьо хҭысуп. 

Аҧсны ААП Ахада еиҭалҳәеит Апалата имҩаҧнаго аус. Лара иазгәалҭеит, ахеилак аофициалтә саит аус шауа абызшәақәа жәпакы рыла, уахь иаҵанакуеит араб бызшәагьы. Уи, ҳәарада, ҳџьынџьуаа ирынаҭоит алша Аҧсны иазку аинформациа дара еилыркаауа абызшәала аиура. Убасгьы аус ауеит иҷыдоу адаҟьа, уи ахархәарала адиаспора ахаҭарнакцәа аҧсуа бызшәа аҵаразы алшара рымоуп. 

«ААП имҩаҧнаго аусқәа Аҧсны анаплакра аизырҳареи, аинвесторцәа рыдыҧхьалареи мацара акәӡам изызку. Иара убасгьы, Апалата лассы-лассы иалахәуп еиуеиҧшым жәларбжьаратәи ацәыргақәҵақәа рҿы, Аҧсны аӡыргара хықәкы хадас ишьҭыхны.

Ҳара, иҳәынҭқаррам ахеилак аҳасаб ала, еиуеиҧшым анҭыҵтәи ахәаахәҭратә еиҿкаарақәа аус рыцаҳуеит, дареи ҳареи аимадара ҳабжьоуп, ҳхаҭарнакрақәа ааҳартуеит еиуеиҧшым атәылақәа рҿы, убри алагьы, Аҧсны жәларбжьаратәи аџьармыкьахь ацәыргара ҳаҿуп», - азгәалҭеит Тамила Мерцхәлааҧҳа.

Аҧсны ААП ахада лажәақәа рыла, ақыҭанхамҩеи атуризми роуп иахьазы Аҧсны ихадоу хырхарҭаны иҟоу. 

«Апроект «Аҧсуа – уҧсадгьыл уаҭаа!» даара акраҵанакуеит атуристтә хырхарҭа арҿиаразы. Ҳара агәыӷра ҳамоуп, ҳдиаспора ахаҭарнакцәа рыҩнқәа рахь ианыхынҳәлак, еиҭарҳәалап ҳәа ирбаз-ираҳаз. Уи иабзоураны, егьырҭ ҳџьынџьуаагьы ирызцәырҵыр алшоит Аҧсны аҭаара агәазыҳәара, агәхьаагара мацара иахҟьаны акәымкәан, аекономика аганахь алагьы», - лҳәеит Тамила Мерцхәлааҧҳа.

Апалата Ахада иалкааны иазгәалҭеит Иорданиа иҟоу АААП ахаҭарнак Али Бакиџьа иааникыло аҭыҧ, уи иабзоурала иалшахеит Аҧснытәи ААП Иордантәи Хашимиттә Акралра Ахәаахәҭра-ааглыхратә Палатеи рыбжьара аимадара ашьақәыргылара.  

«Иҭабуп ҳәа шәаҳҳәоит иҳашәҭо ацхыраара азы. Шәара шәыбзоурала ҳара ҳарҧылоит даара аинтрес змоу ауаа, қәҿиарала урҭ аусгьы рыцаҳуеит», - азгәалҭеит АААП Ахада.

Али Бакиџь иганахь ала ус иҳәеит: «Аҧсны – сара Сыҧсадгьыл оуп! Сара исылшо зегь ҟасҵалароуп уи шәҭы-какаҷхаразы, уи аӡыргаразы. Ахәаахәҭра-ааглыхратә палата ау ацура сара сзы акрызҵазкуа, ҳаҭыр зқәысҵо усны иҟоуп. Ҳаҧхьаҟа ишьҭоуп аус рацәа, сара анаҩсгьы исылшо зегь ҟасҵалоит еицаҳзеиҧшу апроектқәа рымҽхак арҭбааразы».

Иара убасгьы иазгәеиҭеит, Аҧсныҟа имҩахыҵыз аҧсшьаҩцәа, араҟа рыҩнеиҧш рхы шырбо.  

Али Бакиџь алаҳәара ҟаиҵеит, ааигәа, Иорданиа аҳҭнықалақь Амман аҟны ишаартхо аҧсуа хәаахәҭратә Центр.

«Уажәазы, ацентр иахәҭоу ашәҟәқәа рҭагаларазы аусқәа мҩаҧысуеит. Анаҩс, аус аулоит Аҧсны Аҳәынҭқарра абираҟ ахаргыланы, аҩныҵҟа ирҭилоит Аҧснытәи аалыҵ», - иҳәеит Иорданиа иҟоу АААП ахаҭарнак.

Тамила Мерцхәлааҧҳа ари аҩыза ажәабжь даараӡа угәы шьҭызхуа, зынӡа иззыҧшымыз, акы акәны ишыҟалаз азгәалҭеит.

«Ари ҳара акыр аамҭа гәҭакыс иаҳаман, иҳалшоз зегь ҟаҳҵон Ацентр апроект шьақәгыларцаз, аус ауырц азы. Убасгьы иаҳҭахуп ари Ацентр ахәаахәҭра мацара акәымкәан, убасгьы акультуратә Центр ҳасабла ахықәкқәа нанагӡо иҟаларц азы. Убраҟа ауаа еизо, Аҧсны ирызцәырнагаз ацәанырракәа еибырҳәо», - инаҵшьны иазгәалҭеит ААП ахада.

Тамила Мерцхәлааҧҳа ирзеиӷьылшьеит асасцәа изҩыдоу аҧсшьара, ацәанырра лашақәа. Лара агәра длыргеит, аӡәыр ауадаҩрақәа изцәырҵуазар, ацхыраар дшазыхиоу.

Аиқәшәара ахыркәшамҭаз, уи алахәылацәа агәаларшәагатә ҳамҭақәа еимырдеит.