Аҧсны Ахәаахәҭра-ааглыхратә палата ахада Тамила Мерцхәлаа усуратә визитла Италиа, ақалақь Турин даҭааны дыҟоуп. Лара лаҭаара мҩаҧысуеит Турин ақалақь Ахәаахәҭра-ааглыхратә палата ахада Винченцо Илотте иҟаиҵаз ааҧхьарала. Тамила Мерцхәлаа длыцуп ААП Адәныҟатәи аимадарақәеи аинвестициақәеи рыҟәша аиҳабы Кама Ҵәыџьҧҳа.

ҧхынгәы 23 Туринтәи ААП аофис хадаҟны имҩаҧысит аҩ-палатак рхадацәа рофициалтә еиҧылара. Тамила Мерцхәлаа лаҭаара хықәкы хадас иамоуп – анаплакратә еизыҟазаашьақәа рышьақәыргылареи наҟ-наҟтәи урҭ рырҿиареи.

«Винченцо Илоттеи сареи ҳаиқәшәараҿы ҳҩыџьагьы инаҵшьны иазгәаҳҭеит аҩ-тәылак рнаплакыҩцәа рыбжьара аусеицура арҭбаареи, арӷәӷәареи ҳшадгылоу. Ҳбизнесуаа рыбжьара аиҿцаарақәа ҟалоит ҳәа агәыӷра ҳамоуп», – азгәалҭеит Тамила Мерцхәлаа.

Лара адырра ҟалҵеит иара убас, аиҧылара аҳәаақәа ирҭагӡаны аганқәа шеилацәажәаз апалатақәа рыбжьара русеицура перспективақәас иҟалаша, наҟ-наҟ Аҧсныи Италиеи рыбжьара ахәаахәҭра-економикатә еизыҟазаашьақәа еихазҳаша.

Уаанӡа, 2015 шықәсазы Аҧсны Ахәаахәҭра-ааглыхратә палатеи Туринтәи ахәаахәҭра-ааглыхратә палатеи еицырзыфеидоу аусеицуразы аиқәшаҳаҭра рыбжьарҵахьан. Иара уи ашықәсан Аҧсны ААП алахәын Турин имҩаҧысуаз IX-тәи Адунеизегьтәи апалатақәа рконгресс. ҧхынгәы 24 рзы Аҧсны Ахәаахәҭра-ааглыхратә палата аделегациа ақалақь Альба иаҭааит, Италиа иҟоу иреиҳаӡоу ашоколадтә фабрикақәа ируаку «Ferrero Rocher» рбаразы. Ари афабрикаҿоуп иахьыҟарҵо адунеиаҿы еицырдыруа ахаақәа «Nutella», «Raffaello».

Ашоколадтә фабрикаҟны Аҧсны ААП аделегациа иддырбеит ашоколад аҟаҵашьа, иара убас ирзеиҭарҳәеит афабрика аҭоурых, уи ахы акит 1942 шықәсазы ақалақь Альба аҟны иаартыз аҭаацәара иртәыз ахаа-мыхаақәа рыдәқьан ала. 1956 шықәса инаркны акомпаниа «Ferrero Rocher» Италиа аҳәаақәа ирҭыҵит, ижәларбжьаратәихеит. Иахьазы акомпаниақәа ргәыҧ «Ferrero Rocher» рыштаб-квартира Лиуксембург иҟоуп, адунеи зегь аҟны 38 хәаахәҭратә компаниа алахәуп, шықәсык ахь 7 млрд евро рыхә атауар еикәнаршоит. Акомпаниа аалыҵ адунеи атәылақәа 50 рҟны ирҭиуеит, Аҧсынгьы уахь иналаҵаны. Араҟа уи рнапы алакуп ЗҲәА «Премиум».

«Иахьа Турин ахәаахәҭра-ааглыхратә палата аҭыҧ ду ааннакылоит аҭыҧантәи аекономика, анаплакратә ус рыҿиареи рыцхыраареи рҿы. Уи иалахәуп Пьемонт иҭаҩу 220 нызқь компаниа рҟынӡа. Туринтәи ААП хықәкылатәи аусмҩаҧгатәқәа реиҿкаара адагьы, иара иалахәу акомпаниақәеи икомпетенттәу аусбарҭақәеи рыбжьара аимадара иадгылоит, иацхраауеит. Ҳара ҳзыҳәан Туринтәи апалата аус ацура – хра злоу, даарагьы аинтерес зцу ҧышәоуп», – ҳәа лыҧхьаӡоит Тамила Мерцхәлаа.

Лара иазгәалҭеит Туринтәи ААП алахәцәа рымаҵ ауразы ҩ-усбарҭак шамоу. Апалата иамоуп иара убас ахатәы химиатә лабораториа, аконгресс-центр Torino Incontra. Зынӡа Италиа иҟоуп ф-миллионк инареиҳаны акомпаниақәеи анаплакқәеи.