Цәыббрамза 18 рзы Москва ақалақь аҟны официалла иаатит Жәларбжьаратәи атуристтә-инвестициатә форум ITIF-2017.

Афорум аиҿкааратә комитет иҟанаҵаз ааҧхьарала уи иалахәхеит Аҧснытәи аделегациа. Аделегациа шьақәгылоуп абарҭ ауаа рыла: Аҧсны Аҧсшьарҭақәеи атуризми рминистр ихаҭыҧуаҩ Асҭамыр Ахба, Аҧсны Ахәаахәҭра-ааглыхратә палата Атуризм аҟәша аиҳабы Инара Даурова, Аҧсны Ахәаахәҭра-ааглыхратә палата еиҿнакааз «Аҧсуа туризм ахеилак» ахада Анна Калиагине, «Аотелиерцәа ргильдиа» ахада Игор Жигуни, иара убас Аҧсны Ахәаахәҭра-ааглыхратә палата Адәныҟатәи аимадарақәеи аинвестициақәеи рыҟәша аспециалист Хьерсон Симониа.

Ари афорум хырхарҭас иамоуп аҧсшьаратә инустриа ҳаамҭа иақәшәо аҟазшьақәа рыла арҿиара, убри аҟнытә хадара злоу зҵаарақәаны араҟа иқәгылеит атуристтә индустриа аусураҿы аметод ҿыцқәа рхархәара. Афорум аҿы атехнологиатә стартапқәа рӡыргара мҩаҧысит.

Ари апроект хықәкыс иамоуп атәыла аҩныҵҟатәи атуризм еиҧш анҭыҵтәи атуризмгьы рганахьала аусеицуразы аҭагылазаашьақәа раҧҵара.

Аҧснытәи аделегациа аҭааит иара убас Москва иаартыз Жәларбжьаратәи атуристтә цәыргақәҵа «Аҧсшьара Leisure 2017».

Цәыббрамза 19 рзы афорум аҳәаақәа ирҭагӡаны имҩаҧысит агастрономтә турқәа рзы афатәқәа ргьамабара. Уаҟа Аҧсны Ахәаахәҭра-ааглыхратә палата аҧсуа чысхкқәа рыпрезентациа мҩаҧнагеит. Апалата ахаҭарнакцәа – ААП Атуризм аҟәша аиҳабы Инара Дауровеи ААП Адәныҟатәи аимадарақәеи аинвестициақәеи рыҟәша аспециалист Хьерсон Симониеи иаарыцҳаит апрезентациа шымҩаҧысуа агастрономтә туризм иазку астол гьежь аҳәаақәа ирҭагӡаны.

Афорум алахәцәа алшара рымоуп аҧсуа ҩқәа ргьама абара, иара убас аҧсуа чаи, ацха, ашәыр ршқәа уҳәа егьырҭ ҳаалыҵқәагьы ахәшьара рыҭара. Ари афорум аҟны апрезентациа – аҧснытәи аалыҵқәа ӡырнагоит еиуеиҧшым афатәқәа ргьамабара иадҳәалоу атуризм арҿиара знапы алаку аудиториаҟны.